Exodus 25

Iminikelo yeThabanikeli

1UJehova uNkulunkulu wathi kuMosi,

2“Tshela ama-Israyeli angilethele umnikelo. Uzakwamukela umnikelo emuntwini munye ngamunye ozizwelayo enhliziyweni yakhe ukuthi anikele. 3Le yiyo iminikelo ozayamukela benikela: igolide, isiliva kanye lethusi, 4okwelukiweyo lamalembu aluhlaza, ayibubende kanye labomvu. Lelembu elicolekileyo, loboya bembuzi, 5lezikhumba zenqama eziphendulwe ngomphendulo obomvu, kanye lezikhumba zezinyamazana zaselwandle, lezigodo zesihlahla somakhakhiya,

6amafutha om-oliva awesibane, amakha azasetshenziswa lamafutha okugcoba abakhethiweyo lephunga lemphepha,

7lamatshe e-onikisi, lamanye amatshe aligugu azagqizwa esambathweni semahlombe kanye lasesambathweni sesifuba.

8“Bangakhele indlu engcwele, ngalokho ngizahlala phakathi kwabo. 9Yenza ithabanikeli leli kanye leziceciso zalo ngendlela engizakutshengisa yona.

Ibhokisi lesivumelwano

10“Kabenze ibhokisi ngezigodo zesihlahla som-akhakhiya – ubude balo bube zingalo ezimbili ezilengxenye, ububanzi bube yingalo elengxenye njalo ukudepha kwalo kube yingalo elengxenye. 11Lilihuqe ngegolide elicolekileyo, ngaphakathi langaphandle, ubuye ulizingezelele ngomthando wegolide.

12Libumbele amasongo amane egolide uwanamathisele ezinyaweni zalo zozine, amabili kwelinye icele kuthi amabili kwelinye njalo. 13Beselisenza imijabo ngesihlahla somakhakhiya liyihuqe ngegolide. 14Hlomani izigodo kulawo masongo emaceleni alelibhokisi kube yizibambo. 15Izigodo lezi zizahlala emasongweni alelibhokisi, zingakhitshwa.

16Beselifaka ubufakazi ebhokisini engizakunika bona.

17“Yenzani isisibekelo esiyisihlalo somusa ngegolide elicolekileyo, sibe yisibekelo – ubude baso bube zingalo ezimbili ezilengxenye, kuthi ububanzi baso kube yingalo elengxenye.

18Lizakwenza amakherubhi amabili ngegolide elicanduliweyo, liwenze ekucineni kwesisibekelo esiyisihlalo somusa emaceleni womabili. 19Yenzani ikherubhi elilodwa nganxanye kuthi ngakwelinye icele lenze elinye, uzawenza amakherubhi abe yinto yinye lesisibekelo kumacele womabili.

20Amakherubhi azakwelulela amaphiko awo phezulu amboze isisibekelo ngawo. Kuzamele ukuthi amakherubhi aqondanise ubuso akhangele isisibekelo. 21Bekani isisibekelo phezu kwebhokisi lesivumelwano, ubusufaka ubufakazi engizakunika bona ebhokisini lesivumelwano. 22Kulapho engizahlangana lawe khona ngikunika imithetho ka-Israyeli ngisesihlalweni somusa, phakathi kwamakherubhi.

Itafula yezinkwa

23“Bazani itafula ngezigodo zesihlahla somokhakhiya ubude bayo bube zingalo ezimbili, ububanzi bayo bube yingalo eyodwa, kuthi ukudepha kwayo kube yingalo elengxenye.

24Lilihuqe ngegolide elicolekileyo, ube usulizingezelela ngomthando wegolide. 25Lenze kuye inxa zonke ibhanti elilingana lobubanzi besandla libeselibumbela kulo umthando wegolide. 26Lenzele amasongo amane egolide liwafake emagumbini womane amasondo etafula. 27Amasongo kawasondelane lebhanti ukuze abambe izigodo zokuthwala itafula.

28Lungisani izigodo zesihlahla som-akhakhiya, lizihuqe ngegolide ukuze uthwale itafula ngazo.

29Njalo yenzani imiganu lezinditshi zayo ngegolide elicolekileyo, kanye lenkezo lezitsha zeminilelo yokuthula. 30Libeke etafuleni izinkwa ezahlukaniselwe uJehova, ukuze zibe phambi kwami ngezikhathi zonke.

Uluthi lwesibane

31“Lizakwenza uluthi lwesibane ngegolide elicolekileyo, lilucandule isidindi salo lomqwayi walo, imbiza zalo lamahlume alo lamaluba alo likwenze kube yinto yinye. 32Izingatsha eziyisithupha zibe ngapha langapha koluthi – ezintathu nganxanye kuthi ezintathu kwelinye icele. 33Yilolo lalolo ugatsha lube lezimbizana ezintathu ezenziwe zafana lamaluba esihlahla se-alimondi, kanye lesiduku seluba, kube njalo kuzo zonke izingatsha ezixhunywe emqwayini woluthi lwesibani. 34Kuzakuthi eluthini lwesibane kube lezimbizana ezine ezenziwe zafanana lamaluba esihlahla se-alimondi, yileyo ibe lehlumela leluba. 35Kube lehlumela ngaphansi kwengatsha ezimbili langaphansi kwezinye ezimbili njalo – zonke kuzingatsha eziyisithupha. 36Iziduku lezingatsha zizakuba yinto yinye kanye loluthi lwesibane, kucandulwe ndawonye ngegolide elicolekileyo.

37“Ngakho lizalwenzela izibane eziyisikhombisa uzimise phezu kwalo ukuze zikhanyise phambi kwalo.

38Incijana lembizana zibe ngezegolide elicolekileyo. 39Uluthi lwesibane kanye lakho konke okuphathelene laso, kuzakwenziwa ngegolide elicolekileyo eliyisisindo esingamakilogramu angamatshumi amathathu lane.

40Nanzelelani ukuthi lizenza njengalokhu owakutshengiswa entabeni.